સિટી ન્યુઝ @ જામનગર : વડાપ્રધાન નરેન્દ્ર મોદી આગામી 10 May ના રોજ જામનગરના મહેમાન બનવાના છે, જેને લઈને છોટી કાશી ગણાતા જામનગર શહેરમાં ભારે ઉત્સાહ જોવા મળી રહ્યો છે. વડાપ્રધાનના આગમન પૂર્વે જ જામનગર મહાનગરપાલિકા અને જિલ્લા વહીવટી તંત્ર દ્વારા શહેરને દુલ્હનની જેમ શણગારવાની કામગીરી યુદ્ધના ધોરણે શરૂ કરી દેવામાં આવી છે. શહેરના મુખ્ય માર્ગો, બિલ્ડિંગો અને સર્કલો અત્યારથી જ રંગબેરંગી રોશનીથી ઝળહળી ઉઠ્યા છે.

પીએમના નિર્ધારિત કાર્યક્રમ મુજબ, તેઓ 10મી તારીખે જામનગર પહોંચશે અને શહેરના સર્કિટ હાઉસ ખાતે રાત્રિ વિશ્રામ કરશે. ત્યારબાદ 11 May ના રોજ તેઓ સોમનાથના ચરણે વંદન કરવા જશે. વડાપ્રધાનના આ પ્રવાસને ધ્યાનમાં રાખીને જામનગરના પ્રતિષ્ઠિત ગૌરવ પથ માર્ગને ખાસ આકર્ષણનું કેન્દ્ર બનાવવામાં આવ્યો છે. ટાઉન હોલથી સાત રસ્તા સર્કલ સુધીના માર્ગના ડિવાઇડરો અને સ્ટ્રીટ લાઇટના થાંભલાઓ પર આકર્ષક રોશની લગાડવામાં આવી છે.

શહેરના પાંચ મુખ્ય સર્કલો—લાલ બંગલા સર્કલ, જિલ્લા પંચાયત સર્કલ, સાત રસ્તા સર્કલ, દિગ્જામ સર્કલ અને મહાકાળી સર્કલ—ને લાઈટિંગથી સજ્જ કરવામાં આવ્યા છે. ખાસ કરીને એરફોર્સ ગેટથી લાલ બંગલા સુધીના માર્ગ પરની રોશની લોકોમાં કુતૂહલ જગાડી રહી છે. જામનગર મનપાના વિદ્યુત વિભાગ દ્વારા રાત-દિવસ એક કરીને આ રોશનીની કામગીરીને આખરી ઓપ આપવામાં આવી રહ્યો છે, જેથી પીએમના આગમન સમયે શહેર ઝગમગી ઉઠે.

સુરક્ષા અને પ્રોટોકોલને ધ્યાનમાં રાખીને સર્કિટ હાઉસ અને તેની આસપાસના વિસ્તારોમાં જિલ્લા વહીવટી તંત્ર દ્વારા ચુસ્ત બંદોબસ્તની વ્યવસ્થા કરવામાં આવી છે. વડાપ્રધાન જે માર્ગો પરથી પસાર થવાના છે, ત્યાં ડિવાઈડરો અને સ્ટ્રીટ લાઈટોના રીપેરીંગથી લઈને રંગરોગાન સુધીની તમામ કામગીરી પૂર્ણ કરી લેવામાં આવી છે. જામનગરના નાગરિકોમાં પણ પીએમને આવકારવા માટે અનેરો ઉમંગ જોવા મળી રહ્યો છે, અને અનેક સંગઠનો દ્વારા સ્વાગતની તૈયારીઓ કરવામાં આવી રહી છે.

આગામી બે દિવસમાં જામનગરના તમામ બાકી રહેલા મુખ્ય માર્ગો અને સરકારી ઇમારતો સંપૂર્ણપણે રોશનીથી ઝળહળી ઉઠશે. વહીવટી તંત્ર દ્વારા સુચારુ આયોજન માટેની તૈયારીઓ હવે તેના અંતિમ તબક્કામાં પહોંચી છે. પીએમ મોદીના આ ટૂંકા રોકાણથી જામનગરના વિકાસ કાર્યોને પણ વેગ મળશે તેવી આશા સેવાઈ રહી છે. સોમનાથની મુલાકાત પૂર્વે જામનગરમાં પીએમનું આ રાત્રિ રોકાણ રાજકીય અને વહીવટી દ્રષ્ટિએ અત્યંત મહત્વનું માનવામાં આવે છે.