સિટી ન્યુઝ @ ભાવનગર :  ભાવનગરની નીલમબાગ સ્થિત સ્ટેટ બેંક ઓફ ઈન્ડિયા (SBI) શાખામાં થયેલા ₹1.35 કરોડના લોન કૌભાંડમાં પોલીસને વધુ એક મોટી સફળતા મળી છે. કેન્દ્ર સરકારની પીએમઈજીપી (PMEGP) યોજના હેઠળ લઘુ ઉદ્યોગ સ્થાપવાના નામે ખોટા બિલો રજૂ કરી બેંક સાથે છેતરપિંડી આચરવાના કેસમાં નીલમબાગ પોલીસે તત્કાલીન બ્રાન્ચ મેનેજરની ધરપકડ કરી છે. આ કેસમાં અત્યાર સુધીમાં ચાર મહિલા લોનધારકો અને બે એજન્ટો સહિત કુલ આઠ શખ્સોની ધરપકડ કરવામાં આવી છે.

મળતી વિગતો અનુસાર, SBI ના આસિસ્ટન્ટ જનરલ મેનેજર કલ્પેશભાઈ ઝાલાએ 31 March ના રોજ આ મામલે ફરિયાદ નોંધાવી હતી. વર્ષ 2023-24 દરમિયાન ચાર મહિલા લોનધારકો—ભૂમીબેન પંડ્યા, કિરણબેન રાઠોડ, જલ્પાબેન શાહ અને જાગ્રતિબેન લાલવાણીએ એજન્ટો ભરત અડવાણી અને સુનિલ હાસેજા સાથે મળીને પૂર્વ આયોજિત કાવતરું ઘડ્યું હતું. તેમણે લઘુ ઉદ્યોગ માટે મશીનરી અને સ્ટોક ખરીદવાના બહાને બેંકમાં બોગસ બિલો રજૂ કરી ₹1,35,00,569 ની ટર્મ લોન અને સીસી લોન મેળવી હતી.

પોલીસ તપાસમાં ચોંકાવનારો ખુલાસો થયો છે કે, આ લોનની રકમનો ઉપયોગ ધંધો સ્થાપવાને બદલે આરોપીઓએ પોતાના અંગત ખર્ચમાં વાપરી નાખ્યો હતો અને બેંકના હપ્તા પણ ભર્યા નહોતા. અગાઉ પકડાયેલા સાત આરોપીઓની પૂછપરછમાં સામે આવ્યું કે, તે સમયે નીલમબાગ શાખામાં મેનેજર તરીકે ફરજ બજાવતા સંતોષકુમાર ભવાની પ્રસાદ બવાણી (ઉંમર 45) પણ આ કૌભાંડમાં સીધી રીતે સંકળાયેલા હતા. તેમણે નિયમોને નેવે મૂકીને અને લોનની યોગ્ય ચકાસણી કર્યા વિના જ આ કરોડોની લોન મંજૂર કરી આપી હતી.

નીલમબાગ પોલીસે પુરાવાઓના આધારે આરોપી મેનેજર સંતોષકુમાર બવાણીની ધરપકડ કરી છે અને વધુ પૂછપરછ માટે રિમાન્ડ મેળવવા કોર્ટમાં રજૂ કરવાની તજવીજ હાથ ધરી છે. આ મામલે BNS એક્ટની વિવિધ કલમો હેઠળ ગુનો દાખલ કરવામાં આવ્યો છે. બેંકના ઉચ્ચ અધિકારીની ધરપકડને પગલે ભાવનગરના આર્થિક અને બેંકિંગ જગતમાં ભારે ચકચાર મચી ગઈ છે.

પોલીસ હવે એ દિશામાં તપાસ કરી રહી છે કે આ કૌભાંડમાં અન્ય કોઈ બેંક કર્મચારી કે મધ્યસ્થીઓની સંડોવણી છે કે કેમ. આટલી મોટી રકમની લોન પાસ કરવામાં આવેલી ચૂક અને સંગઠિત ગુનાખોરીના તાર ક્યાં સુધી જોડાયેલા છે તે અંગે ઊંડાણપૂર્વક તપાસ શરૂ કરવામાં આવી છે. બેંકિંગ ક્ષેત્રમાં શ્રદ્ધા જાળવી રાખવા માટે આવા ગુનેગારો સામે કડક દાખલો બેસાડવો જરૂરી બન્યો છે.