મોરબી | સિટી ન્યૂઝ : મોરબી સીટી એ-ડિવિઝન પોલીસ સ્ટેશનમાં નોંધાયેલા સાયબર ફ્રોડના એક ગંભીર ગુનામાં પકડાયેલા આરોપીના જામીન ગુજરાત હાઈકોર્ટ દ્વારા મંજૂર કરવામાં આવ્યા છે. આરોપી પક્ષના વકીલો દ્વારા કરવામાં આવેલી ધારદાર કાયદાકીય દલીલો અને સર્વોચ્ચ અદાલતોના વિવિધ ચુકાદાઓને ધ્યાને રાખીને હાઈકોર્ટે આરોપીને શરતી જામીન પર મુક્ત કરવાનો આદેશ આપ્યો છે. આ કેસની વિગતો મુજબ, આરોપી ભરતભાઈ પરસોતમભાઈ બારડની આ કૌભાંડમાં સંડોવણી હોવાના આક્ષેપ સાથે પોલીસે ધરપકડ કરી જેલ હવાલે કર્યો હતો.

સમગ્ર બનાવની વિગત એવી છે કે, મોરબી એ-ડિવિઝન પોલીસ સ્ટેશનમાં એક સાયબર ફ્રોડની ફરિયાદ નોંધાઈ હતી. જેમાં આક્ષેપ કરવામાં આવ્યો હતો કે આરોપીઓએ એકબીજાના મેળાપીપણામાં પૂર્વ આયોજિત કાવતરું રચી, અલગ-અલગ એજન્ટોની નિમણૂક કરી હતી. આ એજન્ટોને આર્થિક લાભની લાલચ આપી તેમના બેંક એકાઉન્ટમાં સાયબર છેતરપિંડીના નાણાં જમા કરાવવામાં આવતા હતા. ત્યારબાદ આ રકમ ચેકથી વિથડ્રો કરી કેશ મેળવીને આખા કૌભાંડના નાણાં સગેવગે કરવામાં આવતા હોવાનું પોલીસ તપાસમાં બહાર આવ્યું હતું. આ મદદગારીના ગુનામાં ભરતભાઈ બારડની ધરપકડ કરવામાં આવી હતી.

જેલવાસ ભોગવી રહેલા આરોપીએ જામીન મેળવવા માટે મોરબીના સિનિયર એડવોકેટ દિલીપભાઈ અગેચાણીયા મારફતે હાઈકોર્ટમાં અરજી કરી હતી. હાઈકોર્ટની સુનાવણી દરમિયાન આરોપી પક્ષ તરફે એડવોકેટ દ્વારા કરવામાં આવેલી દલીલોમાં જણાવાયું હતું કે આરોપીને ખોટી રીતે સંડોવી દેવામાં આવ્યો છે અને આ સાથે જુદી જુદી અદાલતોના મહત્વના ચુકાદાઓ પણ રજૂ કરવામાં આવ્યા હતા. બંને પક્ષોની લાંબી દલીલોના અંતે, હાઈકોર્ટે આરોપી પક્ષના વકીલની દલીલોને ગ્રાહ્ય રાખી શરતી જામીન મંજૂર કર્યા હતા.

આ હાઈ-પ્રોફાઈલ કેસમાં આરોપી તરફે વકીલોની આખી ફોજ મેદાને હતી. જેમાં હાઈકોર્ટના એડવોકેટ સાવન ડી. મોઘરીયા, મોરબીના સિનિયર વકીલ દિલીપભાઈ અગેચાણીયા, જીતેન ડી. અગેચાણીયા, રવી ચાવડા, કનૈયાલાલ બાવરવા, હસમુખ ચાવડા, ક્રિષ્ના જારીયા, મહેશ્વરી મકવાણા અને જયોતીકા કુરીયા રોકાયેલા હતા. હાઈકોર્ટના આ ફેંસલાથી આરોપીને મોટી રાહત મળી છે, જોકે કોર્ટે જામીન માટે કેટલીક આકરી શરતોનું પાલન કરવાનું પણ સૂચન કર્યું છે.

મોરબીમાં સાયબર ક્રાઈમના વધતા જતા કિસ્સાઓ વચ્ચે આ પ્રકારના કાનૂની વિજયની ચર્ચા વકીલ આલમમાં જોરશોરથી ચાલી રહી છે. પોલીસ હવે આ કેસમાં અન્ય ફરાર આરોપીઓ અને છેતરપિંડીના મૂળ સુધી પહોંચવા માટે વધુ તપાસ કરી રહી છે. હાઈકોર્ટે જામીન આપતા સમયે તપાસમાં સહકાર આપવાની શરત પણ મુખ્ય રાખી હોવાનું જાણવા મળ્યું છે.