સિટી ન્યુઝ @ સુરેન્દ્રનગર

સુરેન્દ્રનગર, સુરેન્દ્રનગર જિલ્લાના વઢવાણ તાલુકામાં આવેલો અને જિલ્લાની જીવાદોરી સમાન વઢવાણ ભોગાવો-૨ (ધોળીધજા) ડેમ ૦.૧ ફૂટથી ઓવરફ્લો થયો છે. ઉપરવાસમાંથી થઈ રહેલી પાણીની સતત આવકને કારણે ડેમનું જળસ્તર સતત વધી રહ્યું છે. આ સ્થિતિને ધ્યાનમાં રાખીને વહીવટી તંત્ર દ્વારા સાવચેતીના ભાગરૂપે ડેમના નીચાણવાળા અને નદીકાંઠાના વિસ્તારોમાં રહેતા લોકોને નદીપટમાં ન જવા અને સંપૂર્ણ સાવધ રહેવા માટે ખાસ એડવાઈઝરી જાહેર કરવામાં આવી છે.

વધતા જળસ્તરને પગલે તંત્ર દ્વારા સુરેન્દ્રનગર શહેર, વઢવાણ શહેર, જોરાવરનગર અને રતનપર તેમજ આસપાસના નીચાણવાળા ગ્રામ્ય વિસ્તારો જેવા કે મેમકા, ભડિયાદ, સાંકળી, ખમીસણા, નાના કેરાળા, નટવરગઢ, દોલાતપર, શિયાણી, રામરાજપર, પરનાળા અને જાંબુ ગામના તમામ નાગરિકોને એલર્ટ રહેવા સૂચના અપાઈ છે. પરિસ્થિતિની ગંભીરતાને પારખીને સ્થાનિક વહીવટી તંત્ર દ્વારા સતત મોનિટરિંગ રાખવામાં આવી રહ્યું છે.

કોઈપણ અણબનાવ ન બને તે માટે નદીકાંઠાના રહીશો અને પશુપાલકોને નદીપટથી દૂર રહેવા તેમજ તંત્ર દ્વારા સમયસર આપવામાં આવતી તમામ સરકારી સૂચનાઓનું ચુસ્તપણે પાલન કરવા અનુરોધ કરાયો છે. વરસાદી માહોલ વચ્ચે જળસ્રોતો ભરાવાથી આગામી સમયમાં સિંચાઈ અને પીવાના પાણીની સમસ્યા હલ થવાની પૂરી સંભાવના છે.

આપત્તિ વ્યવસ્થાપન

ડેમ ઓવરફ્લો થવાની સ્થિતિમાં વહીવટી તંત્ર દ્વારા લેવાયેલા આગોતરા પગલાં અને નાગરિકો માટે જારી કરાયેલી ચેતવણીઓ જાનમાલની સુરક્ષા માટે અત્યંત આવશ્યક સાબિત થાય છે.