• શિકાર મળતો બંધ થવાથી સિંહોએ વસ્તીવાળા વિસ્તારો તરફ કૂચ કરી હોવાનો ખુલાસો!

• છેલ્લા કેટલાક સમયથી માણસો પર સિંહે કરેલા હુમલાની વધતી જતી ઘટનાઓથી ચિંતા!

• ૩ દાયકાથી વધુનો અનુભવ ધરાવતા પૂર્વ વન સંરક્ષક ઉદય વોરા પાસેથી જાણો રહસ્ય!

સિટી ન્યુઝ @ અમદાવાદ

અમદાવાદ, છેલ્લા કેટલાક સમયથી માણસ પર સિંહે કરેલા હુમલાની ઘટનાઓએ સમગ્ર રાજ્યમાં ચિંતા વધારી દીધી છે. ભાવનગર પંથક અને જાફરાબાદના દરિયા કિનારા સુધી સિંહો જોવા મળી રહ્યા છે, ત્યારે મોટો સવાલ એ થાય છે કે આખરે સિંહ જંગલની બહાર કેમ નીકળી રહ્યાં છે? આ અંગે ૩ દાયકાથી વધુનો અનુભવ ધરાવતા પૂર્વ વન સંરક્ષક ઉદય વોરા પાસેથી સિંહોના બદલાતા મિજાજનું ચોંકાવનારું ગણિત સામે આવ્યું છે, જેમાં જંગલ નાનું પડવાને બદલે મેદાનને બદલે ઝાડ વધ્યા હોવા અને શિકાર મળતો બંધ થવાના કારણો મુખ્ય ગણાવવામાં આવ્યા છે.

ગીરના સિંહો આજકાલ પોતાની આદતો અને માનવ વસાહતો તરફ દોટ મૂકવાના કારણે ચર્ચામાં છે. જૂન અને જુલાઈ મહિનામાં સિંહો દ્વારા માનવીઓ પર હુમલા કરવાના અનેક ગંભીર બનાવો બન્યા છે. ગિરનાર પર્વત પર ૫૦મા પગથિયા પાસેથી સિંહ બાળકને ખેંચી ગયો હતો તેવા બનાવો તેમજ પાલિતાણાના મોટા ગરાજિયા ગામે બનેલી ઘટનાઓ સાક્ષી પૂરે છે કે આ તમામ બનાવો જંગલની બહાર જ બન્યા છે. સિંહોનું આ પ્રકારે બહાર નીકળવું અને વસ્તી તરફ આવવું પર્યાવરણ અને સુરક્ષા બંને દૃષ્ટિએ ગંભીર વિષય છે.

વન નિષ્ણાતોના મતે જંગલની અંદર બદલાતી પરિસ્થિતિઓ અને શિકારની પ્રાપ્યતામાં થતી ઘટને કારણે સિંહો પોતાની ટેરિટરી બદલવા મજબૂર બન્યા છે. મેદાની વિસ્તારોમાં ઘટતા ખુલ્લા પ્રદેશો અને ઝાડ-ઝાંખરાનું વધતું પ્રમાણ તેમની શિકાર કરવાની પદ્ધતિને અસર કરે છે.

આ ગંભીર સમસ્યાના કાયમી ઉકેલ માટે વન વિભાગ અને સરકાર દ્વારા વૈજ્ઞાનિક અભિગમ અપનાવીને સિંહોના કુદરતી વાતાવરણ અને માનવ વસ્તી વચ્ચે યોગ્ય સંતુલન સ્થાપિત કરવું અત્યંત આવશ્યક બની ગયું છે.