• આ યોજનાનો મુખ્ય હેતુ ઊંડા સમુદ્રમાં તેલ અને ગેસની શોધમાં થતાં ખર્ચમાં મદદ કરવાનો છે.

• મૂળભૂત માળખા માટે 10,000 કરોડ રૂપિયા અને ડેટા માટે 28,534 કરોડ રૂપિયા ફાળવાયા છે.

• ભારત પોતાની જરૂરિયાતનો અડધો કુદરતી ગેસ પણ વિદેશમાંથી જ આયાત કરે છે.

સિટી ન્યુઝ @ નવી દિલ્હી

નવી દિલ્હી, વડાપ્રધાન નરેન્દ્ર મોદીની અધ્યક્ષતામાં કેન્દ્રીય કેબિનેટે શુક્રવારે 84,084 કરોડ રૂપિયાની વિશાળ 'સમુદ્ર મંથન' નેશનલ ઓફશોર એક્સપ્લોરેશન સ્કીમને મંજૂરી આપી દીધી છે. આ મહત્વાકાંક્ષી યોજનાનો મુખ્ય હેતુ ઊંડા સમુદ્રમાં તેલ અને ગેસની શોધમાં થતાં ભારે ખર્ચમાં મદદ કરવાનો, શોધ માટે નવા કૂવા ખોદવાનો અને તેલ કાઢવા માટે જરૂરી મૂળભૂત માળખું તૈયાર કરવાનો છે. દેશમાં ઊર્જા ક્ષેત્રને આત્મનિર્ભર બનાવવા માટે આ એક ઐતિહાસિક પગલું ગણવામાં આવી રહ્યું છે.

અધિકારીઓનાં જણાવ્યાં અનુસાર, આ યોજના હેઠળ ઊંડા અને અત્યંત ઊંડા સમુદ્રમાં ખોદવામાં આવનારાં દરેક કૂવા માટે સરકાર દ્વારા 650 કરોડ રૂપિયા સુધીની આર્થિક મદદ પૂરી પાડવામાં આવશે. આ પગલું દેશમાં તેલ અને ગેસનું સ્થાનિક ઉત્પાદન વધારવા તેમજ વિદેશી દેશો પરની આયાત નિર્ભરતા ઘટાડવા માટે લેવાયું છે. વર્તમાન સમયમાં ભારત પોતાની કાચા તેલની જરૂરિયાતના મોટાભાગના હિસ્સા માટે આયાત પર જ નિર્ભર રહેવું પડે છે.

આ યોજના અંતર્ગત 10,000 કરોડ રૂપિયા માત્ર મૂળભૂત માળખા એટલે કે ઇન્ફ્રાસ્ટ્રક્ચર માટે ફાળવવામાં આવ્યા છે, જે શોધાયેલા તેલ અને ગેસને સફળતાપૂર્વક બહાર કાઢવામાં મદદ કરશે. આ ઉપરાંત, યોજનામાં 28,534 કરોડ રૂપિયા સમુદ્ર સાથે જોડાયેલા મહત્વપૂર્ણ ડેટા એકત્ર કરવા માટે અને 2,000 કરોડ રૂપિયા તેલ-ગેસ સંબંધિત મેન્યુફેક્ચરિંગ અને સર્વિસ ઝોન બનાવવા માટે નક્કી કરવામાં આવ્યા છે, જેથી રોજગારીની તકો પણ ઊભી થઈ શકે.

આંકડાકીય દૃષ્ટિએ જોઈએ તો, ભારતની કાચા તેલ માટે વિદેશો પરની નિર્ભરતા છેલ્લા 10 વર્ષમાં 77 ટકાથી વધીને 88 ટકા સુધી પહોંચી ગઈ છે. આ સાથે જ, ભારત પોતાની જરૂરિયાતનો લગભગ અડધો કુદરતી ગેસ પણ બહારથી જ મંગાવે છે. આ ગંભીર સ્થિતિને કાબૂમાં લેવા માટે આ યોજના ખૂબ જ કારગર સાબિત થશે.

આગામી સમયમાં આ યોજનાના અમલીકરણથી દેશની ઊર્જા ક્ષમતામાં મોટો વધારો થશે અને વૈશ્વિક સ્તરે ભારતીય અર્થતંત્ર વધુ મજબૂત સ્થિતિમાં આવશે તેવી પ્રબળ સંભાવના છે.